سؤال : متى وكيف تريد أن تموت...؟
سؤال غريب لكن الأجوبة عليه جاءت أغرب
ـــــــــــــــــــــــــ
~ مو لكون نحنا بالأول عايشين لحتى نحكي عن الموت
~ لا يهمني متى أموت , فأنا مستعد لذاك أفضل استعداد , فعلاقتي بربي واضحة لا لبس فيها , فهو المتصرف وأنا مجرد وديعة لا تلبث أن ترد إلى من أودعها
~ شوهالسيرة العاطلة عند الصبح , شو موت ما موت , أنا هنا وجدت كي أبقى وكفى , ولفوها سيرة .
~ لكل نفس أجل , ولا راد لقضاء الله , اللهم اجعلها على الإيمان وفي أي وقت أو زمان.
~ لو كان لي خيار , فأفضل أن أموت بعد ان أكمل دفع أقساط البيت , وبعد أن يتخرج جميع أبنائي من الجامعة , وأفضل لو أموت قبل زوجي عافاه الله.
~ أنتم الكتاب تخترعون قصصاً من عقولكم وتشغلون الناس بها , ثم هل لنا من خيار نحن البشر أقدارنا هي من تحركنا وليس لنا من الأمر شيء والسؤال غلط بغلط.
~ أنا مالي مستعد هلق منوب منوب , عندي سفرة على ماليزيا وبعد ما أرجع بجاوبكن على هالسؤال.
~ أفضل أن يقبض الله روحي بعد ان أبلغ الثمانين , فأنا لست مستعجلاً الآن , المستعجل يتفضل .
~ الأحسن ان أموت على سريري دون مرض طويل 3 -4 أيام لا غير , من حولي لن يستطيعون خدمتي لو طال الأمر بي .
~ أحبها طويلة ونحيفة وليست سمينة وقصيرة , عن عمري اتحدث , ولو كان الامر بيدي لطلبت ان يكون يوم جمعه بعد العصر , شرط ان يكون جميع أولادي عندي , وادفنوني فوق المرحوم زوجي في تربة الحقلة.
~ المتل ...الموت دح ومو لمين ما كان بصح....الله يجعلها عالإيمان الكامل , بس يبدو أني مطول لسا ما استويت.
~ وليي ....شو هالسؤال...عليي ديون كتيرة وأولادي لن يحسنوا التصرف بعدي فأمهلوني 10 سنين وبعد ذلك لكل حادث حديث.
~ ما فكرت بهيك سؤال...بس إذا ولا بد بعد ما حج لبيت الله و هيك أحسن , والأحسن موت هنيك بعد مجاورة سنة.
~ شوف ....هو الأعمار بيد الله...لكن إذا بدكن تخيروني جد...خير الأمور اوسطها يعني بعمر 50 حاجة بيكفي الله يعفي عنا لهون وبس دنيي ما بتحرز تنعاش.
~ والله من هالعذاب يللي عم نشوفه كل يوم والتاني بفضل موت اليوم ...إيه اليوم قبل بكرة , والله غفور رحيم وعارف احوالنا وما عندو إلا الرحمة.
~ أنا عائلتي كلهن (معمرين) لساتني مطول كتير , ولكن الاستحياط واجب , اشتريت قبر بمليون و200 ألف عم يستناني
~ لو يوافقوني على الموت الرحيم ...أرحملي..11 سنة ونصف على جنب واحد , وصرفت كل شي معي , يعني ميت بس عم اتنفس
~ مشروعي الصناعي الذي بدأت به يحتاج إلى 10 سنوات حتى يقلع بصورة جيدة , وأعمار امة محمد بين الـ 60 – 70...فهل سيكمل مشروعي أبنائي , أرجو ذلك
~ إذا عن حالي...أنا ضابب الشنتة من زمان....لكن قطار الموت ما شرف أنا انتظر لقاء الله واحب ذلك
~ يا ناس خلوني بحالي أحسن شي موت بقذيفة تموتني وتموت كل عيلتي ما حدا بيزعل على حدا
~ موت...الموت علينا حق...بس السؤال غريب شوية , أما إذا بدكن رأيي بصراحة حابه موت بعد ما تموت ضرتي يلل بأصغر مني بـ 15 سنة , لا تقولوا بدي موتها ...هي جريمة...بدي إلها موتة ربانية يعني لحالها وبالها
~ وما تدري نفس ماذا تكسب غداً ولا تدري نفس بأي أرض تموت , الموت علينا حق ولا مهرب منه , ولكن هل أعدننا انفسنا للقاءه....هذا هو السؤال , وليس ومتى وكيف